الرئيسية » أخبار مصر » مرسي على وشك ان «يعملها».. حد يشوف له حمام بسرعة!!

مرسي على وشك ان «يعملها».. حد يشوف له حمام بسرعة!!

أحمد عفيفي يكتب: مرسي على وشك ان «يعملها».. حد يشوف له حمام بسرعة!!

أحمد عفيفي

25-3-2013

أصلها مش ناقصة قرف يا عم الريس .. حتى منتش عارف تنقي الكلام وتنتقيه ، وبعدين تزعل مننا وتقول اننا بنتريق عليك ونتمسخر .. فيه رئيس دولة محترمة يقول انا على وشك أن افعلها ؟ .. طيب معملتهاش ليه في البيت قبل ما تنزل .. وعندك بدل الحمام عشرة .. وبعدين امسك نفسك يا أخي .. ده انت راجل ” كُبّارة ” ومحترم .. وبعدين لمّا تيجي تتكلم بلاش ” تحزق ” أوي وبعدين تلاقي نفسك محتاس .. خد الأمور ع الهادي .. وخليك حليم .. ده الحلم سيد الأخلاق .. وبلاش النفخة الكدابة دي .. لأنك انت وجماعتك والله العظيم تلاتة وما لك عليا يمين يا شيخ ، مش حتقدروا على شعب مصر .. ده شعب ميجيش بلوي الدراع .. هو يفوّت لك مرة واتنين لحد عشرة .. بس ساعة ما ” يهيج ” .. يجيب الكبير ويعملها معاه!ّ

هو انت يا عم مرسي كل ماتتزنق تبخ في وشنا بكلمتين فارغين .. لا يودوا ولا يجيبوا .. «قِلّتهم» أحسن .. يا راجل فوق بقى .. انت عايش في كوكب تاني ولا بتحكم بلد تاني ولا شعب تاني غيرنا .. يا راجل البلد بتولع ولسه حتولع اكتر ، وانت عاجبك صباعك رايح جي تحطه في وشنا .. بتهدد مين يا عم مرسي .. كان غيرك اشطر .. والله ووالله وولله لو فضلت على عماك بالشكل ده ومتخيل انك بالترويع والحبس والتضحية بكام واحد حتمسك البلد بقبضة حديدية تبقى بتحلم .. واللي عملك رئيس ظلمك .. وبعدين ايه حكاية حتضطر احبس ناس ؟ .. كده من نفسك ، من غير قانون ولا نيابة ولا تحقيق .. يافلان .. احبس لي ابراهيم عيسى والابراشي والبت ريم ماجد ومنى الشاذلي .. واول ما يسري فودة يفوق من العملية ويخرج من المستشفي اقبضوا عليه وخلوه يحصّل أصحابه .. احنا ناس عندنا رحمة .. مش ممكن نحبس الراجل وهو عيان وقايم من حادثة .. الأصول أصول.

ناوي على ايه يا عم الحاج .. حنقضيها كلام .. «انا عارف مين بيتكلم مع مين ومين جي من فين وناوي يعمل ايه .. وعليا الطلاق ما انا راحم حد .. انا رئيس جي بعد ثورة واللي يجي عليا كأنه بيجي ع الوطن» .. وطن مين يا عم مرسي .. مالك انت ومال ام الوطن .. وهو فين الوطن ده ؟ انت خليت فيها وطن .. ده بقى متفكك وحاله زفت وناسه مش طايقة بعضها .. الكل عايز يطفش ويسيبها لك «مخضرة» ايكش تشبع .. بس وكتاب الله واللي خلق الخلق ما حيحصل ابدا انك تستولى على مصر وتعمل فيها انت وناسك مابدالكم.

مشكلتك يا مرسي انك لسه متعرفش المصريين .. هما كده .. يصبروا كتير وفي لحظة يشوطوا بالجزمة .. واحد من عندك يضرب بنت من بناتهم بالقلم .. يمسكوا ألف من عندك ويمرمطوا بيهم الأرض .. حتضرب حيضربوا .. حتشيل سلاح حيشيلوا سلاح .. حتقتل حيقتلوا .. والشاطر «الشاطر بجد مش الشاطر بتاعك او اللي انت بتاعه» هو اللي يضحك في الأخر.

خليك زي ما انت عايز .. خلي النائب العام بتاعك في مكتبه .. وسيب حكومة قنديل تعك لمّا تقول يا بس .. وسيب وزير الداخلية يضرب في شعبه ويحبس ناسه .. بس في الأخر حتدفع التمن ، وحتدفعه غالي أوي يا فخامة الرئيس .. وحطها حلقة في ودنك اللي بيشيل «إربة» مخرومة بتخر على دماغه ودماغ اللي خلفوه.

«فوق» يا مرسي .. لا «يفوّقك» اللي اكبر منك .. وساعتها مش حتلاقي حد يبكي عليك ولا «يعبّرك» .. فاللي عملته فينا في 8 شهور تستحق عليه السجن مدى الحياة.

روح يا شيخ ربنا ينتقم منك!!

اضف رد

لن يتم نشر البريد الإلكتروني .

x

‎قد يُعجبك أيضاً

الصحة: تسجيل 171 إصابة جديدة بفيروس كورونا.. و 9 حالات وفاة

أعلنت وزارة الصحة والسكان، اليوم الجمعة، خروج 50 من المصابين بفيروس كورونا من مستشفيات العزل ...